Errefuxiatu-esparrua

||

Beren herrialdetik, eskualdetik edo jaioterritik ihes egin duten pertsonen asentamendua antolatua, gatazka armatuak, jatorriko lurraldeetako interes ekonomikoak, indarkeria orokortua edo biztanleriaren sektore baten aurkakoa direla-eta. Denbora jakin batez babes-esparru izateko helburua du, baina, dena den, haietako zenbait asentamendu iraunkor bihurtu dira eta hamarkadak daramatzate bertan, han nahitaez bizi behar duten pertsonen giza eskubideetarako horrek dituen inplikazio garrantzitsu guztiekin.

Sarritan, beren herrialdearen barruan desplazatutako pertsonak hartzeko altxatzen dituzte, eta, hori horrela, ‘errefuxiatuen’ esparruak direla esaten bada ere, kontuan izan behar da egoera horrek barne-desplazamendua jasan duten pertsonak ere barnean hartzen dituela .

Esparruen autonomia-maila, dentsitatea, tamaina eta egitura izugarri aldatuko da testuinguru batetik bestera. ‘Errefuxiatu-esparru’ terminoa asentamendu txiki irekiak (mugikortasuna librea da eta pertsonek autonomia-maila handia dute) eta itxiak (pertsona kopuru handia biltzen da bertan, ezin dira bertatik atera eta haien biziraupena kanpo-ekintzaren mende dago erabat) izendatzeko erabiltzen da.

Oso jarrera desberdinak daude haien komenigarritasunaren inguruan, errefuxiatu eta desplazatuen egoerari erantzuteko. Alde daudenek argumentatzen dute, besteak beste, ezinbestekoak direla eta abantaila praktikoak dituztela laguntzak kudeatzeko eta lan humanitarioa gauzatzeko. Jarrera kritikoek, aldiz, honako hau nabarmentzen dute: agente emaileen eta erakunde humanitarioen interesetan oinarritutako asentamenduen politika baten zati dira, eta ez hainbeste errefuxiatuen kalteberatasun eta ahalmenetan; euspen politikoko modu bat dira desplazamendu behartuen kausak aztertzea saihesteko; eta ondorio pertsonal, sozial, kultural, ekonomiko eta sanitario negatiboak dituzte, baita ingurumen-arlokoak ere.

Print Friendly

Irantzu Mendia ikertzaileak nabarmentzen duenez, “esku hartzen dutenean, nazioarteko agentzia humanitarioek eta GKEek, oro har, alde batera uzten dituzte errefuxiatu-esparruen komenientziari buruzko kontsiderazio politikoak errefuxiatuentzako aldi baterako konponbide egoki diren edo ez aztertzeko, eta gai teknikoagoetan kontzentratzen dute euren arreta”.

Bibliografia

  • Mendia, I. (2000): ‘Campo de Refugiados’, Diccionario de Acción Humanitaria y Cooperación al Desarrollo lanean. Hegoa Institutua, Universidad del País Vasco / Euskal Herriko Unibertsitatea.